Dr. Viriatu Luís Soares Kassama ətraf mühit idarəçiliyi və iqlim siyasəti sahəsində tanınmış liderdir. O, 2023-cü ilin dekabr ayından etibarən Qvineya-Bisau Respublikasının Ətraf Mühit, Biomüxtəliflik və İqlim Dəyişikliyi üzrə Fəaliyyətlər Naziri vəzifəsini icra edir. Əvvəllər Prezidentin Ətraf Mühit və İqlim Məsələləri üzrə Müşaviri (2023), Ətraf Mühit və Biomüxtəliflik Naziri (2020–2023), həmçinin Ətraf Mühit üzrə Baş Direktor (2016–2020) olub.

Dr. Kassama Lissabon Açıq Universitetindən Qlobal Araşdırmalar üzrə fəlsəfə doktoru (PhD) dərəcəsinə, Lissabon Texniki Universitetindən Geo-resurslar və Təbii Ehtiyatların İdarəolunması üzrə magistr dərəcəsinə və Yeni Lissabon Universitetindən Ətraf Mühit Mühəndisliyi üzrə beşillik bakalavr dərəcəsinə malikdir. Həmçinin o, Bakı Neft Akademiyasında Kimya və Neft Mühəndisliyi üzrə təhsil almışdır.

Peşəkar fəaliyyətində Dr. Kassama davamlı inkişaf və iqlimə uyğunlaşma sahələrində dərin öhdəlik nümayiş etdirmişdir. O, Qvineya-Bisaunu BMT-nin İqlim Dəyişikliyi üzrə Çərçivə Konvensiyası (UNFCCC) çərçivəsində əsas danışıqlar aparan şəxs və milli koordinator kimi təmsil etmiş, REDD İşçi Qrupunun koordinatoru və Yaşıl İqlim Fondu, Adaptasiya Fondu və İqlim İnvestisiya Fondu üzrə əlaqələndirici olmuşdur.

Dr. Kassama bir sıra ətraf mühitin idarə olunması və iqlimə uyğunlaşma layihələrinə rəhbərlik etmişdir, o cümlədən BMTİP/GEF tərəfindən dəstəklənən layihələrə. O, həmçinin Kioto Protokolunun icrasında ölkəsini təmsil etmiş və PALOPS (Portuqal Dilli Afrika Ölkələri) üzrə ekoloji məsələlər üzrə aparıcı tədqiqatçı kimi fəaliyyət göstərmişdir.

İyirmi ildən artıq yüksək vəzifəli dövlət və beynəlxalq təcrübəyə malik olan Dr. Kassama Qvineya-Bisaunun davamlı inkişafına mühüm töhfə verməkdə davam edir.

Rövşən Nəcəf Çingiz oğlu 1982-ci il aprelin 9-da Bakı şəhərində anadan olub. 1997-ci ildə Azərbaycan Dövlət İqtisad Universitetinin (ADİU) Beynəlxalq iqtisadi münasibətlər fakültəsinə daxil olub, 2001-ci ildə bakalavr, 2003-cü ildə isə magistratura proqramını fərqlənmə ilə bitirib. 2007-2008-ci illərdə ARDNŞ-nin təqaüd proqramı çərçivəsində ABŞ-ın Kolumbiya Universitetində təhsil alaraq İqtisadi Siyasətin İdarəedilməsi/Beynəlxalq Enerji Menecmenti və Siyasəti üzrə magistr proqramını uğurla bitirib. Əmək fəaliyyətinə 2001-ci ildə ADİU-nin Beynəlxalq iqtisadi münasibətlər və marketinq kafedrasında laborant vəzifəsində başlayıb. 2003-2007-ci illərdə Azərbaycan Respublikasının (AR) İqtisadi İnkişaf Nazirliyinin İnvestisiyalar və beynəlxalq iqtisadi əməkdaşlıq Departamentinin İnvestisiya siyasəti şöbəsində məsləhətçi və baş məsləhətçi vəzifələrində çalışıb. 2008-2009-cu illərdə ARDNŞ-nin Sərmayələr İdarəsinin Sərmayələr üzrə kontraktlar şöbəsinin rəisi vəzifəsində işləyib. 2009-2010-cu illərdə AR İqtisadi İnkişaf Nazirliyində Xarici iqtisadi əlaqələr şöbəsinin müdiri və İqtisadi inkişaf nazirinin köməkçisi olub. 2010-2018-ci illərdə “Azərbaycan İnvestisiya Şirkəti” ASC-nin icraçı direktorunun müavini və icraçı direktoru vəzifələrində çalışıb. Azərbaycan Respublikası Prezidentinin müvafiq Sərəncamları ilə 2018-ci il 11 may tarixində Azərbaycan Respublikası Prezidentinin Administrasiyasının İnnovativ inkişaf və elektron hökumət məsələləri şöbəsinin müdiri, 2019-cu il 28 avqust tarixində AR Maliyyə Monitorinqi Xidmətinin İdarə Heyətinin sədri, 2020-ci il 11 fevral tarixində AR İqtisadiyyat nazirinin müavini, 2021-ci il 24 dekabr tarixində AR İqtisadiyyat nazirinin birinci müavini, 2022-ci il 10 fevral tarixində SOCAR-ın birinci vitse-prezidenti və prezidenti vəzifəsinin müvəqqəti icraçısı, 2022-ci il 21 iyul tarixində Azərbaycan Respublikası Dövlət Neft Şirkətinin prezidenti təyin edilib.

İqtisadiyyat üzrə fəlsəfə doktorudur. 3-cü dərəcəli dövlət müşaviridir. Evlidir, 2 övladı var.

Cio 24 ildir ki, bp-dədir və bu müddət ərzində şirkətin biznesinin müxtəlif sahələrində rəhbər vəzifələrdə çalışıb. Cio bp-nin apstrim biznesində əməliyyatlar və idarəetmə sahəsində geniş təcrübə toplayıb. O, bp-nin texniki həllər bölümünün baş vitse-prezidenti vəzifəsində şirkətin qlobal bir təşkilatına rəhbərlik edərək fərqli bir iş icrası təmin etmək məqsədilə bp-nin apstrim və emal biznesləri ilə sıx işləyib.
Cionun Padua Universitetindən termodinamika üzrə fəlsəfə doktoru (PhD) və kimya mühəndisliyi üzrə magistr dərəcələri var. O, həmçinin Kimya Mühəndisləri İnstitutunun üzvü və sertifikatlı alimdir. O, həmçinin Beynəlxalq Neft və Qaz İstehsalçıları Assosiasiyasının sədridir. Bu mövqedə o, bütün neft və qaz sektorunda əməkdaşlığı fəal şəkildə təşviq edir.

Azərbaycan Respublikasının Prezidenti cənab İlham Əliyevin 28 iyul 2023-cü il tarixli Fərmanı ilə Arzu Cavadova Azərbaycan Respublikası Dövlət Neft Şirkətinin Təbii ehtiyatların kəşfiyyatı seqmenti üzrə vitse-prezidenti vəzifəsinə təyin edilib.

O, 1984-cü ildə Azərbaycan Neft və Kimya İnstitutunun geoloji-kəşfiyyat fakültəsinə daxil olaraq, 1989-cu ildə fərqlənmə ilə bitirmişdir. Geologiya/mineralogiya üzrə fəlsəfə doktoru-elmlər namizədi elmi dərəcəsini almışdır. 50-dən artıq elmi məqalə və kristalların hidrotermal şəraitdə yetişdirilməsi mövzusuna dair Moskva Dövlət Kristalloqrafiya İnstitutundan alınmış 2 elmi ixtiranın müəllifidir.

Əmək fəaliyyətinə 1985-ci ildə Azərbaycan Neft və Kimya İnstitutunda başlamışdır. 1985-1986-cı illərdə Azərbaycan Neft və Kimya İnstitutunun “Ümumi, tarixi geologiya və hidrogeologiya” kafedrasında, 1987-1988-ci illərdə isə “Geofiziki kəşfiyyat üsulları” kafedrasında 0.5 ştat laborant, 1989-1991-ci illərdə ”Neft və qaz yataqlarının axtarışı və kəşfiyyatı” kafedrasında mühəndis vəzifəsində çalışmışdır. 1990-cı ildə “Neft və qaz yataqlarının axtarışı və kəşfiyyatı” kafedrası nəzdində aspiranturaya daxil olmuş, kafedrada təhsil zamanı 0.5 ştat, 1994-cü ildə bitirdikdən sonra 1996-cı ilə qədər isə tam ştat müəllim-assistent vəzifəsində çalışmışdır. 1996-1997-ci illərdə ARDNŞ-nin “Azərineftinformatika” hesablama mərkəzində mühəndis, 1997-ci ildə Dənizdə neft və qazçıxarma İstehsalat Birliyinin mərkəzi laboratoriyasında geokimyaçı-qrup rəhbəri, Dənizdə neft və qaz yataqlarının işlənməsinə nəzarət ekspedisiyasının Neft geokimya qrupunun rəhbəri kimi çalışmışdır.

1997-1999-cu illərdə ABŞ “Frontera Resorses” neft şirkətində baş geoloq, 1999-2003-cü illərdə “Salyan Oil” Ltd. şirkətində aparıcı və işlənmə üzrə geoloq, 2003-2007-ci illərdə isə “Delta Hess ACG” Ltd. şirkətində geoloji işlər üzrə baş mütəxəssis vəzifələrində çalışmışdır. 2007-2022-ci illərdə “BP Exploration” (Caspian Sea Ltd.) şirkətinin kəşfiyyat şöbəsində baş geoloq, qrup rəhbəri, geoloji kəşfiyyat üzrə menecer, karbohidrogen sistemləri üzrə analitik vəzifələrində çalışmışdır.

2022-ci ildə SOCAR-ın Baş geoloqu vəzifəsinə təyin edilmişdir.

Əfqan İsayev 2023-cü ilin iyul ayından etibarən Azərbaycan Respublikası Dövlət Neft Şirkətinin (SOCAR) vitse-prezidenti vəzifəsini icra edir. O, şirkətin enerji keçidi, ətraf mühit üzrə təşəbbüsləri və dekarbonizasiya sahəsində həyata keçirilən fəaliyyətlərə rəhbərlik edir.

Əfqan İsayev hazırkı vəzifəsinə təyin olunmazdan əvvəl, 2014-cü ilin aprel ayından 2024-cü ilin mart ayınadək “Cənub Qaz Dəhlizi” Qapalı Səhmdar Cəmiyyətinin baş direktoru olmuşdur. Eyni zamanda, 2013–2022-ci illər ərzində SOCAR prezidentinin müşaviri və “AzRigs” MMC-nin Direktorlar Şurasının üzvü qismində fəaliyyət göstərmişdir. 2012–2013-cü illərdə isə “SOCAR Georgia Investment” MMC-yə rəhbərlik etmişdir.

Karyerasının əvvəlki mərhələlərində Əfqan İsayev müxtəlif strateji və rəhbər mövqelərdə çalışmışdır. 2009–2012-ci illərdə Azərbaycan Dövlət İnvestisiya Şirkətinin (AIC) icraçı direktoru, 2004–2009-cu illərdə isə “Bank of Baku” ASC-nin İdarə Heyəti sədrinin müavini olmuşdur. Peşəkar fəaliyyətinə ABŞ-ın Nyu-York şəhərində yerləşən “American Express” şirkətində başlamış və 1998–2004-cü illər ərzində həmin şirkətdə müxtəlif vəzifələrdə çalışmışdır.

Əfqan İsayev 1996-cı ildə “Rutgers” Universitetini fərqlənmə ilə bitirərək, Maliyyə (BSc) və İqtisadiyyat (BA) ixtisaslarına yiyələnmiş, həmçinin Avropa Araşdırmaları sahəsində əlavə ixtisas dərəcəsini əldə etmişdir.

O, təhsilini “Rutgers” Universitetinin İdarəetmə üzrə magistratura pilləsində davam etdirmiş və 1998-ci ildə Maliyyə və İdarəetmə İnformasiya Sistemləri ixtisasını fərqlənmə diplomu ilə bitirərək, MBA dərəcəsini almışdır.

Babək Hüseynov SOCAR-ın İşlənmə və Hasilat Əməliyyatları üzrə vitse-prezidentidir O, SOCAR Upstream seqmentinin Xəzər hövzəsində və onun hüdudlarından kənarda seçilən Operatora çevrilməsi və tranformasinın təşkilinə rəhbərlik edir.

Babək Hüseynov Kolumbiya Universitetində Sənaye mühəndisliyi ixtisası üzrə təhsil alıb.

O, Qərbi Afrika və ABŞ-da quru və dəniz yataqlarında 18 ildən artıq peşəkar neft və qaz təcrübəsinə malikdir. Babək Hüseynov SOCAR-a gəlməzdən əvvəl “Hess Corporation” ” şirkətində  rəhbər vəzifələrdə çalışıb. Babək Hüseynov “Bronze Lean Leader” sertifikatına malikdir , proseslərin  təkmilləşdirməsi və optimallaşdırması üzrə ixtisaslaşıb.

Nəsirov Elşad Mustafa oğlu 1960-cı ildə Bakı şəhərində anadan olub. 1982-ci ildə Moskva Dövlət Beynəlxalq Əlaqələr İnstitutunu bitirib.

1981-1982-ci illərdə SSRİ-nin Əfqanıstandakı səfirliyində, 1982-1985-ci illərdə SSRİ Elmlər Akademiyasının Şərqşünaslıq İnstitutunda, 1985-1989-cu illərdə SSRİ Xarici İşlər Nazirliyində müxtəlif vəzifələrdə çalışıb. 1989-1992-ci illər ərzində SSRİ-nin Hindistandakı səfirliyində işləyib. Azərbaycan dövlət müstəqilliyini bərpa etdikdən sonra, 1992-1995-ci illər ərzində Azərbaycan Respublikasının BMT yanındakı Daimi Nümayəndəliyində çalışıb, 1995-1997-ci illərdə Azərbaycan Respublikası Xarici İşlər Nazirliyində idarə rəisinin müavini olub. 1997-2003-cü illərdə ARDNŞ-nin Xarici iqtisadi əməliyyatlar İdarəsinin, 2003-2005-ci illərdə isə Marketinq və iqtisadi əməliyyatlar İdarəsinin rəisi vəzifələrində işləyib.

Azərbaycan Respublikası Prezidentinin 28 dekabr 2005-ci il tarixli Sərəncamı ilə şirkətin vitse-prezidenti vəzifəsinə təyin olunub. 2004-cü ildən Azərbaycan Futbol Federasiyaları Assosiasiyasının vitse-prezidentidir. 2010-cu ildə Azərbaycan Respublikası Prezidenti İlham Əliyevin Sərəncamı ilə “Şöhrət” ordeni ilə təltif edilib. Yeni Azərbaycan Partiyasının üzvüdür.