Sizi “Bakı Enerji Həftəsi” çərçivəsində keçirilən bu mötəbər tədbirdə səmimi- qəlbdən salamlayıram. Artıq uzun illərdir ki, “Bakı Enerji Həftəsi” qlobal enerji gündəliyinin formalaşdırıldığı, yeni yanaşma və əməkdaşlıq formatlarının təşəkkül tapdığı nüfuzlu platformaya çevrilib. Bu tədbirin əhəmiyyəti hər il daha da artır. Çünki dünya ənənəvi enerji modelindən dayanıqlı, aşağı karbonlu inkişaf strategiyasına və texnoloji yeniliklərə əsaslanan yeni enerji sisteminə keçid mərhələsini yaşayır. Belə bir şəraitdə Azərbaycanın qlobal enerji dialoqunda rolu daha da güclənir.

Ölkəmizin enerji tarixi zəngin ənənələrə və mühüm tarixi nailiyyətlərə əsaslanır. Hələ XIX əsrdə Azərbaycanda müasir neft sənayesinin formalaşması ölkəmizi qlobal enerji tarixinin aparıcı mərkəzlərindən birinə çevirmişdir. XX əsr Ümummilli Lider Heydər Əliyevin rəhbərliyi ilə Azərbaycanın beynəlxalq enerji tərəfdaşlıqlarının formalaşdığı dövr olmuşdur. XXI əsrdə isə ölkəmiz artıq “yaşıl enerji”yə keçid və dayanıqlı enerji modelinin qurulması istiqamətində yeni mərhələyə qədəm qoymuşdur.

Azərbaycanın həyata keçirdiyi enerji siyasəti bu gün də mühüm nəticələr verməkdədir. Cari il enerji sahəsində bir sıra əlamətdar hadisələrlə yadda qalır. Xüsusilə, “Şahdəniz” qaz yatağı üzrə Hasilatın Pay Bölgüsü Sazişinin imzalanmasının 30 illiyi və bu yataqdan kommersiya qaz hasilatına başlanmasının 20 illiyi Azərbaycanın qlobal enerji bazarında güclü mövqeyini və ölkəmizin enerji strategiyasının uğurla həyata keçirildiyini bir daha təsdiqləyir.

Hazırda dünyada enerji sektoru dayanıqlı inkişafın əsas sütunlarından biridir. Müasir geosiyasi proseslər göstərir ki, enerji təhlükəsizliyinin etibarlı təminatı enerji mənbələrinin şaxələndirilməsi və innovativ texnologiyaların tətbiqi ilə birbaşa bağlıdır. Bu baxımdan, bərpa olunan enerji və aşağı karbon texnologiyalarına investisiyalar sürətlə artır. Enerji keçidi artıq yalnız ekoloji məsələ deyil, həm də iqtisadi təhlükəsizlik və rəqabətqabiliyyətlilik amilinə çevrilmişdir.

Ölkəmiz də “yaşıl enerji” istiqamətində ardıcıl siyasət həyata keçirir və strateji mövqeyini daha da möhkəmləndirir. Avrasiyanın enerji və nəqliyyat marşrutlarının kəsişməsində yerləşən ölkəmiz regional enerji əməkdaşlığının inkişafına etibarlı tərəfdaş kimi mühüm töhfə verir. Bol enerji resursları, formalaşdırılmış infrastruktur vəbeynəlxalq səviyyədə qazanılmış yüksək etimad əsas üstünlüklərimizdir.

Azərbaycanın zəngin bərpa olunan enerji potensialı “yaşıl enerji” istiqamətində uzunmüddətli strateji hədəflərin həyata keçirilməsi üçün geniş imkanlar yaradır. Beynəlxalq enerji şirkətləri ilə irihəcmli “yaşıl enerji” layihələrinin həyata keçirilməsi və təbii qaz ixracının geniş coğrafiyanı əhatə etməsi ölkəmizin qlobal enerji sistemində etibarlı və strateji tərəfdaş kimi rolunu daha da gücləndirir. Dünya İqtisadi Forumunun enerji keçidi ilə bağlı hesabatında Azərbaycanın qabaqcıl mövqelərdə qərarlaşması da bunun beynəlxalq səviyyədə yüksək qiymətləndirildiyini göstərir.

Bərpa olunan enerji sahəsində mövcud potensialın reallaşdırılması və “yaşıl enerji” imkanlarının genişləndirilməsi qarşıdakı dövrün əsas strateji hədəfləridir. Bu yanaşma enerji sistemində keyfiyyətcə yeni mərhələnin başlanğıcını ifadə edir. Həmin mərhələdə əsas prioritetlər enerji resurslarının səmərəli idarə olunması ilə yanaşı, bərpa olunan enerji mənbələrinin inkişafı, “yaşıl enerji”yə keçidin sürətləndirilməsi və müasir texnologiyaların tətbiqidir.

Xüsusilə, işğaldan azad edilmiş ərazilərdə həyata keçirilən genişmiqyaslı bərpa- quruculuq işləri çərçivəsində “yaşıl enerji zonası” modelinin uğurla tətbiqi ölkəmizin gələcək enerji strategiyasının əsas istiqamətlərindən birinə çevrilmişdir. Bu yanaşmanın uğurla həyata keçirilməsi onun daha da genişləndirilməsinə və Naxçıvanın da “yaşıl enerji zonası” elan edilməsinə zəmin yaratmışdır.

Əminəm ki, “Bakı Enerji Həftəsi” bundan sonra da qlobal enerji dialoqunun genişlənməsinə, yeni təşəbbüslərin formalaşmasına və dayanıqlı enerji gələcəyinin qurulmasına mühüm töhfə verəcəkdir. Sonda tədbirin təşkilatçılarına və iştirakçılarına təşəkkürümü bildirir, hər birinizə uğurlu əməkdaşlıq, məhsuldar müzakirələr və yeni nailiyyətlər arzulayıram!

Bakı şəhəri, 01 iyun 2026-cı il
İlham Əliyev

Sizi Azərbaycanda böyük məmnuniyyətlə salamlayır, Bakı Enerji Həftəsi çərçivəsində keçirilən 31-ci Beynəlxalq Xəzər Neft və Qaz Sərgisi, 14-cü Xəzər Beynəlxalq Energetika və Yaşıl Enerji Sərgisi, eləcə də 31-ci Bakı Enerji Forumunun açılışı münasibətilə təbrik edirəm. 

Ulu Öndər Heydər Əliyevin təşəbbüsü ilə neft-qaz yataqlarına investisiya cəlb etmək və ölkəmizin liderliyi ilə Xəzər regionunu aparıcı enerji mərkəzlərindən birinə çevirmək məqsədilə yaradılan bu platforma zamanla transmilli enerji təhlükəsizliyi layihələrinin formalaşmasına töhfə vermiş, bu gün isə “yaşıl enerji” tərəfdaşlıqları və Azərbaycanın artıq özünün investor kimi çıxış etməsi ilə yeni məzmun qazanmışdır. 

Təchizat şokları, tranzit marşrutlarının dəyişməsi və enerji bazarlarında artan qeyri-müəyyənlik fonunda enerji təhlükəsizliyinin yenidən qlobal siyasətin əsas prioritetinə çevrilməsi, həm dayanıqlı və etibarlı enerji təchizatçısı, həm də Xəzər regionunu Orta Dəhlizin əsas logistika mərkəzinə çevirən Azərbaycanının strateji əhəmiyyətini daha da artırır. 

Xüsusilə Azərbaycan Respublikasının Prezidenti cənab İlham Əliyevin ölkəmizin Xəzər regionu üçün enerji və data bağlantılarının, enerji tutumlu rəqəmsal iqtisadiyyatın qurulmasında və təchizat marşrutlarının şaxələndirilməsində rolunu gücləndirən siyasəti bu istiqamətdə yeni layihələrin reallaşmasına yol açır. Bu baxımdan “Xəzər-Qara dəniz-Avropa”, Naxçıvandan birbaşa və Ermənistan üzərindən keçməklə “Azərbaycan-Türkiyə-Avropa”, eləcə də “Transxəzər” və “Şərq-Qərb” yaşıl enerji dəhlizləri və interkonnektor layihələri Azərbaycan vasitəsilə Cənubi Qafqaz, Mərkəzi Asiya, Türkiyə və Avropa arasında yeni enerji körpülərinin qurulmasını təmin edəcəkdir. Strateji elektrik təchizatı arxitekturasını formalaşdıran bu layihələr süni intellekt, data mərkəzləri və rəqəmsallaşma fonunda artan elektrik enerjisi tələbatının ödənilməsində mühüm mənbələrdən biri kimi çıxış edərək ölkəmizin qlobal enerji təhlükəsizliyindəki mövqeyini daha da möhkəmləndirəcəkdir. 

Xəzər hövzəsində yaranan bu geniş əməkdaşlıq imkanları bir daha təsdiq edir ki, Bakı Enerji Həftəsi uzunmüddətli perspektivdə də ortaq təşəbbüslərin müzakirə olunduğu və yeni tərəfdaşlıqların qurulduğu mühüm platforma olaraq qalacaqdır.  

İnanıram ki, qarşılıqlı faydalı əməkdaşlığımız ölkələrimizin davamlı inkişafına və daha geniş coğrafiyada enerji təhlükəsizliyinin təmininə bundan sonra da mühüm töhfə verəcək, Bakı Enerji Həftəsi isə dayanıqlı enerji gələcəyinin qurulmasında etibarlı dialoq məkanı kimi rolunu davam etdirəcəkdir. 

Bakı Enerji Həftəsinin bütün iştirakçılarını bir daha təbrik edir, hər birinizə uğurlar arzulayıram! 

Hörmətlə, 

Pərviz Şahbazov 
Azərbaycan Respublikasının energetika naziri  

Sizi Bakı Enerji Həftəsi çərçivəsində təşkil olunan 31-ci Beynəlxalq Xəzər Neft və Qaz Sərgisi, 31-ci Bakı Enerji Forumu və 14-cü Xəzər Beynəlxalq Təmiz Enerji Sərgisinin açılışı münasibətilə səmimiyyətlə salamlayıram. Bu mötəbər platformanın enerji sahəsində əməkdaşlığın genişlənməsinə və dayanıqlı enerji gələcəyinin formalaşmasına töhfə verəcəyinə inanıram. 

Əsası Ümummilli Lider Heydər Əliyev tərəfindən qoyulan və Azərbaycan Respublikasının Prezidenti cənab İlham Əliyevin müasir dövrün çağırışlarına uyğun təkmilləşdirərək uğurla davam etdirdiyi milli enerji strategiyamız ölkəmizə beynəlxalq arenada qüdrətli dövlət və etibarlı tərəfdaş mövqeyi qazandırıb.  

Bu gün Azərbaycanın təşəbbüsü ilə həyata keçirilən strateji əhəmiyyətli enerji layihələri regionun və Avropanın enerji təhlükəsizliyinin ayrılmaz tərkib hissəsinə çevrilib. Ötən bir il ərzində Azərbaycanın təbii qaz ixrac etdiyi ölkələrin sayının 12-dən 16-ya yüksəlməsi, o cümlədən Azərbaycan qazının Türkiyə üzərindən Suriyaya nəql edilməsinə başlanması ölkəmizin qlobal enerji bazarlarında artan rolunun növbəti təzahürüdür.  

SOCAR olaraq fəaliyyət coğrafiyamızın genişləndirilməsi strateji prioritetlərimizdəndir. Cari ilin may ayında SOCAR tərəfindən “Italiana Petroli” (IP) şirkətinin səhmlərinin 99,82%-nin “API Holding”dən alınması  prosesi uğurla tamamlandı. Bununla yanaşı, Kot-d’İvuarda “Baleine” neft-qaz yatağının işlənməsi layihəsində 10%-lik iştirak payının alınması və Özbəkistanın “Üstyurt” investisiya bloklarının kəşfiyyatı, işlənməsi və hasilatı üzrə Pay Bölgüsü Sazişi çərçivəsində genişmiqyaslı seysmik kəşfiyyat və qazma işlərinə başlanması SOCAR-ın qlobal genişlənmə strategiyasının mühüm istiqamətlərindəndir. 

COP29-un uğurlu nəticələrindən ilham alaraq, dekarbonizasiya və yaşıl enerji keçidini fəaliyyətimizin əsas istiqamətlərindən biri kimi davam etdiririk. 2050-ci ilə qədər "xalis sıfır" hədəfinə doğru irəliləyərkən, əməliyyatlarımızda ekoloji məsuliyyət prinsipini rəhbər tuturuq. 

2026-cı il Azərbaycan enerji strategiyasının  inkişafında müstəsna əhəmiyyətə malik “Şahdəniz” qaz-kondensat yatağı üzrə Hasilatın Pay Bölgüsü Sazişinin imzalanmasının 30-cu və layihə çərçivəsində ilk kommersiya qaz hasilatına başlanmasının 20-ci ildönümləri ilə əlamətdardır. Azərbaycanın enerji təhlükəsizliyinin möhkəmlənməsində mühüm rol oynayan “Şahdəniz” layihəsinin uğurla icra olunması ölkəmizin daxili tələbatının tam ödənilməsi ilə yanaşı, onu qaz idxalçısından etibarlı ixracatçıya çevirib. 

Eyni zamanda, cari ildə regionun enerji xəritəsini dəyişən və “Üç dənizin əfsanəsi” adlandırılan Bakı-Tbilisi-Ceyhan boru kəmərinin istismara verilməsinin 20-ci ildönümünü qeyd edirik. “Əsrin müqaviləsi”nin əsas tərkib hissəsi kimi həyata keçirilən bu kəmər  Azərbaycan neftinin birbaşa dünya bazarlarına çıxarılmasında və ölkəmizin dayanıqlı iqtisadi inkişafında mühüm yer tutur. 

İnanıram ki, 30 ildən artıq qlobal sənaye liderlərini və tərəfdaşları bir araya gətirən Bakı Enerji Həftəsi çərçivəsində aparılacaq müzakirələr və qurulacaq yeni əməkdaşlıq əlaqələri ədalətli enerji keçidi təşəbbüsünə mühüm töhfə olmaqla yanaşı, innovativ yanaşmaların tətbiqinə təkan verəcək və birgə səylərimizi daha da gücləndirəcək. 

Hər birinizə səmərəli fəaliyyət, məhsuldar müzakirələr və yeni uğurlu tərəfdaşlıqlar arzulayıram. 

Ən xoş arzularla, 

Rövşən Nəcəf 
SOCAR-ın prezidenti 

“Baku Energy Week” ildən-ilə güclənən və Azərbaycanın regional və qlobal enerji tərəfdaşlarını bir araya gətirməkdə oynadığı mühüm rolu vurğulayan bir tədbirdir. 

Bu, həm də bütün enerji növlərinin gündəmdə olduğu bir forumdur; gələcəyin enerji yollarının inkişafına holistik, balanslı və realist yanaşmanı əks etdirən bir tədbirdir. Bu vizyon OPEC tərəfindən tam dəstəklənir. 

Neft və onunla bağlı məhsullar olmadan bir dünya təsəvvür edin. Belə bir dünyada nəqliyyat dayanar, ərzaq istehsalı məhv olar, səhiyyə xidmətləri sıradan çıxar və iqtisadi artım geriləyərdi. 

Bu gün dünya ilbəil daha çox neft istehlak edir. Əslində, keçən il qaz, kömür və bərpa olunan enerji mənbələrinin istehlakı da rekord səviyyəyə çatmışdır. İnkişaf etməkdə olan ölkələrdə əhali artımı, urbanizasiya, iqtisadi inkişaf və süni intellekt kimi enerji tələb edən yeni sahələrin yaranması fonunda dünyada bütün enerji növlərinə daha çox ehtiyac var. 

Gələcəyimizin enerji təminatı üç əsas prinsipi əhatə etməlidir: enerji təhlükəsizliyi, hər kəs üçün enerji əlçatanlığı və emissiyasının azaldılması. Bu prinsiplərdən yalnız birinə üstünlük verilə bilməz; bunların hamısı eyni zamanda təmin edilməlidir. 

OPEC həmçinin qeyd edir ki, bu üç prinsipi təmin etmək üçün sabitlik zəruridir. Bu, Azərbaycanın da əsas iştirakçı olduğu OPEC və qeyri-OPEC istehsalçılar arasında Əməkdaşlıq Bəyannaməsi (DoC) çərçivəsində görülən tədbirlərdə aydın görünür. 

Bu il dekabr ayında 10 illiyini qeyd edəcək DoC qlobal neft bazarının sabitliyi üçün həyati əhəmiyyət kəsb etmiş, sənayenin iki böyük böhranı aşmasına kömək etmiş və gələcək sənaye investisiyaları üçün platforma təmin etməyə davam edir. 

Azərbaycanın DoC-a davamlı dəstəyi, neft bazarının davamlı sabitliyinə verdiyi töhfə və 2024-cü ildə COP29-a ev sahibliyi edərkən konstruktiv iştirakı, gələcəyin enerji yollarının inkişafında liderliyini bir daha təsdiqləyir. 

Əminik ki, bütün bunlar “Baku Energy Week” tədbirində nümayiş olunacaq. Sizə səmərəli işlər arzulayırıq. 

Hörmətlə, 
Haysam Əl-Qays 
OPEC-in Baş Katibi